Shetitja e nje hutaqi
Nënë, do të dal të shëtis!
-Mire, Xhovan, vetëm shiko si ta kalosh rrugën!
-Mire, nënë. Mirupafshim!
Xhovani doli i gëzuar dhe në fillim ishte mjaft i kujdesshëm. Kohë pas kohe ndalej dhe prekte trupin e vet.
-A jam i tëri? Po, -dhe qeshte me vetveten.
Ai ishte i lumtur që ishte syqelë, që kërcente si zog, mirëpo pas pak u habit pas vitrinave, pas veturave, pas reve dhe, kuptohet, filluan pakënaqësitë.
Një zotëri iu drejtua me mirësjellje:
-A po sheh sa je habitur? Tanimë e ke humbur njërën dorë.
-O, keni të drejtë. Qenkam habitur fare.
Filloi të kërkojë dorën, mirëpo në rrugë gjeti një kanoqe të koka-kollës. Vallë vërtet është e zbrazët? Haj ta shoh. Po çfarë do të ketë pasur para se të bëhej e zbrazët? Me siguri në fillim nuk do të ketë qënë e zbrazët…
Xhovani harroi se ishte nisur të kërkojë dorën, kështu që më vonë e harroi edhe kutinë, sepse një qen i çalë i doli përpara dhe ja, duke dashur ta arrijë qenin, para se ai të kthehej te këndi, e humbi edhe këmbën. As këtë nuk e hetoi, por vazhdoi vrapin.
Një grua e mirë i thirri:
-Xhovan, Xhovan! Këmbën!
Por më kot, ai nuk dëgjoi fare.
Eh, s’ka gjë, — tha gruaja e mirë, -do t’ia shpie nënës tënde.
Shkoi ajo në shtëpiné e Xhovanit:
-Zonjë, ja ku e keni këmbën e birit tuaj.
-Ah, biri im harraq. Nuk di më ç’të bëj dhe çfarë të them.
-E, zonjë, të gjithë fëmijët janë të tillë.
Pas pak erdhi një grua tjetër e mire.
-Zonjé, e gjeta këtë krah, mos është i Xhovanit?
-PO, kuptohet se është i tij, sepse e njoh sipas gishtave të përlyer. Ah, sa i dalldisur është biri im. Nuk di më çfarë të bëj dhe çfarë të them.
-Ashtu është, të gjithë fëmijët janë të tillë.
Pas pak kohe erdhi një plakë. Pas asaj, çiraku i bukëpjekësit. Pastaj një vozitës i tramvajit. Madje edhe një mësuese e pensionuar… Dhe çdo njëri solli ndonjë pjesë të trupit të Xhovanit: këmbë, vesh, hundë…
Po vallë, mund të ketë ndonjë fëmijë më hutaq se biri im?
-Eh, zonjë, të gjithë fëmijët janë të tillë.
Më në fund, duke kërcyer me një këmbë, ia mbërriti vetë Xhovani: pa veshë, pa duar, por i
hareshëm si çdoherë, i hareshëm si një zog, kurse nëna ia lëmoi kokën, e rregulloi dhe e puthi:
-A e sheh nënë, se nuk më mungon asgjë? A nuk jam, nënë, i dëgjueshëm?
Po, Xhovan, ti vërtet je shumë i dëgjueshëm, -iu përgjigj ajo.